अकोला दिव्य ऑनलाईन : राज्यात लाडकी बहिण योजनेला मिळालेला उदंड प्रतिसाद आणि लाडका भाऊ पुन्हा मुख्यमंत्री होईल यासाठी भगिनींमध्ये पसरलेले आनंदाचे वातावरण आता ओसरले आहे. वाढीव ७०० रुपयांचे जाऊ द्या पण योजनेचा १५०० रुपयांचा पुढील सहावा हप्ता भगिनींच्या खात्यावर कधी येणार, या मुद्द्यावर सर्वाधिक चर्चा होत आहे. अकोला जिल्ह्यात चार लाखांहून अधिक महिला लाडकी बहिण योजनेच्या लाभार्थी आहेत. राज्यात नवे सरकार स्थापन झाले आहे. फक्त मंत्रिमंडळाचा विस्तार व्हायचा आहे, त्यामुळे सहावा हप्ता कधी मिळणार याची उत्सुकता आहे.
विधानसभा निवडणुकीत मुख्यमंत्री लाडकी बहिण योजनेची बरीच चर्चा झाली होती. आपल्या लाडक्या बहिणींनी देखील या योजनेला पसंत केले आणि पाठिंबा दिल्याचा महायुतीचा दावा आहे. आता या सरकारची पुनर्रचना होणार असल्याने नवे सरकार या लाडक्या भगिनींना पुढील हप्ता कधी देणार की देणार नाही, याची उत्सुकता भगिनींना लागली आहे. निवडणुकीत दिलेल्या आश्वासनानुसार वाढीव ७०० रुपयांसह रक्कम मिळणार का, अशी चर्चा भगिनींमध्ये सुरू आहे.
प्रत्यक्षात मतदान होईपर्यंत खरं तर योजनेचे चार हप्त महिलांच्या खात्यात जमा व्हायला हवे होते. मात्र तत्कालिन मुख्यमंत्री शिंदे यांनी लाडक्या बहिणींच्या खात्यात पाच हप्त्यांची रक्कम जमा केली आहे. जुलै 2024 पासून सुरू झालेल्या या योजनेंतर्गत जिल्ह्यातील सुमारे चार लाख 40 हजार महिला कालमर्यादेत पात्र ठरल्या आहेत. बहुतांश पात्र महिलांच्या खात्यावर निधी जमा करण्यात आला आहे. रक्षाबंधनाच्या पार्श्वभूमीवर जुलै आणि ऑगस्ट महिन्यातील पहिला आणि दुसरा हप्ता पात्र महिलांच्या खात्यात जमा करण्यात आला. त्यानंतर सप्टेंबर महिन्याचा हप्ताही काही दिवसांच्या अंतराने महिलेच्या खात्यात जमा झाला. नोव्हेंबरमध्ये आचारसंहिता लागू होणार असल्याने ऑक्टोबर आणि नोव्हेंबर महिन्याची एकत्रित रक्कम दिवाळीच्या पूर्वसंध्येला महिलांच्या खात्यात जमा करण्यात आली. ज्या महिलांना कोणताही हप्ता मिळाला नाही त्यांना मतदानानंतर पाच हप्ते मिळतील, असे आश्वासन प्रचार काळात मुख्यमंत्री शिंदे यांनी दिले होते.
रक्कम वाढेल का?
महायुतीचे सरकार पुन्हा सत्तेवर आल्यास या योजनेची रक्कम 1500 वरून 2100 रुपये करण्याचे आश्वासन महायुतीने दिले आहे. आता युतीचे सरकार आल्याने योजनेचा हप्ता 2100 रुपये होणार का, अशीही चर्चा सुरू आहे. किंवा भगिनींना यासाठी थोडी वाट पहावी लागेल. ज्या पद्धतीने बातम्या सुरू आहेत, त्यामुळे बहिणींनाही या लाभापासून वंचित राहण्याची भीती आहे. मात्र, ही योजना सुरू ठेवण्याचे आश्वासन देण्यात आले आहे.
या योजनेत एकूण साडेसात हजार रुपये हप्त्याने दिले. दरम्यान आचार संहितेदरम्यान योजनांचा लाभ घेता आला नाही, तर निवडणुका संपताच आवडत्या बहिणींच्या खात्यात पैसे जमा करण्याचे आश्वासन देण्यात आले. त्यामुळे आता निवडणुका संपल्या असून, लाडक्या बहिणींच्या खात्यावर सहावा हप्ता कधी येणार? याची जिल्ह्यातील लाडकी भगिनी वाट पाहत आहेत.
