Tuesday, July 23, 2024
Homeसामाजिकडॉ प्रेमलता माहेश्वरी यांना स्व.बसंतीबाई चांडक स्मृति साहित्यकार पुरस्कार प्रदान

डॉ प्रेमलता माहेश्वरी यांना स्व.बसंतीबाई चांडक स्मृति साहित्यकार पुरस्कार प्रदान

अकोला दिव्य न्युज ब्युरो : आज साहित्य क्षेत्रातही महिलांचा मोठ्या प्रमाणात शिरकाव होत असून, ही प्रगती व प्रगल्भतेची नांदी आहे. आईच्या भावभावनांचे संजीव चित्रण असलेल्या पुस्तकाला मिळालेला पुरस्कार हा, सर्वच समाजातील संपूर्ण मातांचा गौरव असल्याचे मत सत्कारमूर्ती व जेष्ठ लेखिका डॉ प्रेमलता माहेश्वरी यांनी व्यक्त केले.

वैद्यकीय सेवा क्षेत्रात कार्यरत श्रीमती बसंतीबाई लक्ष्मीनारायण चांडक रिसर्च फाउंडेशनच्या वतीने आणि अ.भा.माहेश्वरी महासभा, माहेश्वरी समाज ट्रस्टच्या संयुक्त विद्यमाने माहेश्वरी भवन येथे संपन्न झालेल्या ५ व्या साहित्य पुरस्कार व स्मृती व्याख्यान कार्यक्रमात यंदाचा माहेश्वरी महिला साहित्यकार पुरस्कार हा लुधियाना येथील जेष्ठ लेखिका डॉ प्रेमलता राधेश्याम माहेश्वरी यांच्या “माँ, एक गृहणी की जीवन यात्रा ” या पुस्तकास देण्यात आला.

मान्यवरांच्या हस्ते यावेळी डॉ. माहेश्वरी यांना एक लाख रुपये,शंभर ग्राम चांदीची नाणी व स्मृतिचिन्ह प्रदान करुन त्यांचा गौरव करण्यात आला.या सोहळ्यात प्रमुख पाहुणे म्हणून अ.भा.माहेश्वरी महासभाचे मध्यांचलमंत्री दिनेश राठी, पुणे येथील जेष्ठ साहित्यिक द्वारका जालान, माहेश्वरी समाज ट्रस्टचे अध्यक्ष विजय पनपालिया,श्रीमती बसंतीबाई लक्ष्मीनारायण चांडक रिसर्च फाउंडेशनचे मुख्य ट्रस्टी श्याम चांडक, पुरस्कार समिती प्रमुख ब्रिजमोहन चितलांगे उपस्थित होते. दीप प्रज्वलन, भगवान महेश पूजन व वंदनेने सोहळ्याचा प्रारंभ झाला.

यावेळी श्याम चांडक व ब्रिजमोहन चितलांगे यांनी पाहुण्यांचे स्मृतिचिन्ह प्रदान करून स्वागत केले. प्रास्ताविकात रिसर्च फाउंडेशनचे मुख्य ट्रस्टी श्याम चांडक यांनी संस्थेच्या सेवाभावी वैद्यकीय व साहित्यिक सेवा उपक्रमाची माहिती दिली. सोहळ्यात पुरस्कार  समितिचे अध्यक्ष ब्रिजमोहन चितलांगे यांनी निवड पद्धतीची माहिती दिली. यावर्षी देशभरातून तब्बल 32 लेखिकांची पुस्तके समितीस प्राप्त झाली होती. त्यातून समितीने सौ माहेश्वरी यांच्या पुस्तकाची निवड केली असल्याचे सांगितले.

यावेळी दिनेश राठी यांनी आपले मनोगत व्यक्त करीत या उपक्रमास आपल्या शुभेच्छा दिल्यात. ज्येष्ठ साहित्यिक द्वारका जलान यांनी सुखी जीवनाचे रहस्य आपल्या व्याख्यानात प्रतिपादित केले. व्यक्तीच्या एकंदर हावभाव व प्रसंगावरून कथा जन्म घेत असल्याचे सांगितले. महत्प्रयासाने बनवलेल्या एखाद्या कलाकृतींस जेव्हा नावे ठेवली जातात, तेव्हा मन कुंठीत होते. मात्र याची तमा न बाळगता जिंदादिलीने जीवन जगायला पाहिजे. शेवटी जीवन म्हणजे काय, तर चांगल्या वाईट घटनांचे सुरेख सौख्यमय मिश्रण असल्याचे त्यांनी आपल्या व्याख्यानात सांगून सत्कार मूर्ती सौ माहेश्वरी यांना शुभेच्छा प्रदान केल्यात. यावेळी या पुस्तकावरील एक चित्रफित दाखविण्यात आली.

कार्यक्रमाला महानगरातील ज्येष्ठ कविवर्य प्रा.घनश्याम अग्रवाल, डॉ. प्रमोद शुक्ल, श्याम शर्मा, प्रा शारदा बियाणे आदींचा सन्मान करण्यात आला. तर डॉ माहेश्वरी दाम्पत्याच्या वतीने श्याम चांडक यांचा स्मृतिचिन्ह देऊन गौरव करण्यात आला. कार्यक्रमाच्या उत्तरार्धात चांडक रिसर्च फाउंडेशनचे ट्रस्टी हीरक मेहता यांनी फाउंडेशनच्या वतीने संचालित बसंती हॉस्पिटल येथे डायलिसिस सेवा प्रदान करणारे तंत्रज्ञ अक्षय जगन्नाथ, अक्षय पवार, मोहम्मद मोईन, गजानन शेगोकार, विशाल तायडे, अक्षय मिसाळ, मोहन खांदेल आदींचा गौरव करीत त्यांना स्नेहभेट प्रदान केली. तसेच बसंती हॉस्पिटलने केलेल्या रुग्णपयोगी सेवेबद्दल गुरुदेव सेवा मंडळाने आयोजित केलेल्या राष्ट्रसंत तुकडोजी महाराज पुण्यतिथी महोत्सवात कालूराम रुहाटिया संस्थेच्या वतीने कार्य गौरव पुरस्कार मिळत असल्याचे जाहीर केले.

प्रा.शारदा बियाणी यांच्या बहारदार सूत्रसंचालनाने कार्यक्रमाला एका नवीन उंचीवर नेले. फाउंडेशनचे ट्रस्टी हिरक मेहता व बसंती हॉस्पिटलचे व्यवस्थापक विजय मुंदडा यांनी आभार मानलेत. यावेळी फाउंडेशनचे ट्रस्टी रमाकांत खेतान, श्रीकिसन अग्रवाल, जयप्रकाश चांडक, सिद्धार्थ शर्मा, राधेश्याम भंसाली, गजानन सोमाणी, शैलेश (बंटी) कागलीवाल, नरेश बियाणी, मनोज चांडक, अँड. महेंद्र पुरोहित, डॉ आशिष पनपालिया, रवि भंसाली, राजेश चांडक, दिनेश मंडोवरा, कास्ट, महेश बजाज, शैलेश तोष्णीवाल, कमल माहेश्वरी, राजेश राठी, घनश्याम जोशी, सीए रमेश चौधरी, राजेश राठी, वंदना मेहता, मंगला तापडिया, राजकुवर लढ्ढा, स्नेहल सावल, डॉ पूजा खेतान समवेत बसंतीबाई चांडक ट्रस्टचे पदाधिकारी, कर्मचारी व महिला, पुरुष मोठ्या संख्येने उपस्थित होते.

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments

error: Content is protected !!