अकोला दिव्य न्युज ब्युरो : भाजपचे नेते, पदाधिकारी आणि आमदार-खासदारांनी निवडणूक प्रचार काळात जनसामान्यांमध्ये मिसळताना आणि झोपडपट्ट्यांमध्ये फिरताना महागड्या गाड्या व राडोसारखी महागडी घड्याळे आदी न वापरता साधी राहणी ठेवण्याच्या सूचना भाजपचे राष्ट्रीय अध्यक्ष जे.पी. नड्डा यांनी पक्षाच्या मुंबईतील नेते व पदाधिकाऱ्यांना दिल्या. मुंबईत महायुतीच्या सहाही उमेदवारांच्या विजयासाठी सर्वतोपरी प्रयत्न करण्याचे आवाहनही त्यांनी केले.
नड्डा हे दोन दिवस मुंबई दौऱ्यावर असून त्यांनी शहरातील सहा लोकसभा मतदारसंघांच्या निवडणूक व्यवस्थापन समितीची दुसरी बैठक घेतली. त्यास व्यवस्थापन समितीत असलेल्या वेगवेगळ्या ३६ विभागाचे प्रमुख, भाजपचे सर्व आमदार व खासदार उपस्थित होते. पंतप्रधान नरेंद्र मोदी यांनी काही महिन्यांपूर्वी झालेल्या राष्ट्रीय अधिवेशनातच सर्व पदाधिकारी व नेत्यांना साधी राहणीमान ठेवण्याचे निर्देश दिले आहेत. विरोधकांनी केलेले आरोप लगेच खोडून काढून त्यांना प्रत्युत्तर देण्यात यावे.
केंद्र व राज्य सरकारच्या योजना आणि केलेली कामे जनतेपर्यंत प्रभावी पद्धतीने पोचविण्यात यावीत. नवीन मतदारांची नोंदणी मोठ्या प्रमाणावर झाली असून त्यांना भाजपकडे आकर्षित करण्यासाठी भेटी घेऊन प्रयत्न करावेत, अशा सूचना नड्डा यांनी पदाधिकाऱ्यांना केल्या. त्याचबरोबर स्थानिक जनतेचे प्रश्न व महत्वाचे मुद्दे नेत्यांनी सरकारपुढे उपस्थित करावेत आणि जे प्रश्न सोडवायचे राहिले असतील, तेही मार्गी लावावेत, अशा सूचना नड्डा यांनी केल्या.
निवडणूक प्रचार तयारी, दौऱ्यांची आखणी, समाजमाध्यमांचा प्रभावी वापरासह अन्य मुद्द्यांवर नड्डा यांनी दोन स्वतंत्र बैठकांमध्ये तयारीचा आढावा घेतला. त्यास उपमुख्यमंत्री फडणवीस, प्रदेशाध्यक्ष बावनकुळे, मुंबई अध्यक्ष आ. आशिष शेलार, राष्ट्रीय सह संघटन मंत्री शिवप्रकाश आदी उपस्थित होते.
